كتب احمد عبد المنعم
فى حب مصر والمصريين بنت الاسكندرية وشاعرتها الكبيرة مريم تبدع اعزب قصائدها فى تهنئة أهل مصر بشهر رمضان .
القصيدة:-
هل هلاله
شهر الصوم
جه يا جماله
صحوا النوم
شهر البركه
وشهر الخير
شهر الصدقه
وخيره كتير
يلا بينا
ياناس علشان
نعلق زينه
ده جه رمضان
شعر او طرحه
صليب وهلال
والمسلسلات والفرحه
ورامز جلال
الفرحه ف البيت والشارع
اللمه والضحكه الحلوه
وصلاه التراويح ف الجامع
الفرض وبعدين السُنة
والسهر لغايه السحور
وبعده ف وقته صلاه الفجر
شئ ثابت زبادي وفول
رمضان فعلا زي البدر
كل الناس ماسكه الفوانيس
كبير صغير بيغني
وف الشارع البلح ف كيس
والكل عمال بيهني
اللمه والصحبه الحلوه
وكل يوم نفطر مع حد
ونودع الشاي والقهوه
ويلا خلاص نبدأ ف الجد
الكنافه والقطايف
ويا التمر الهندي
والقرايب والسلايف
انهارده عندك بكره عندي
وصله الرحم اللي بتتوصل
ف الشهر ده بالذات
والذنوب اللي بتتغسل
فيك ي شهر البركات
كل حاجه ممكن تتغير
الا فرحه الشهر ده
حاجه غريبه فعلا و تحير
والكل بيقول كده
كل سنه وانت هنا
وتعيش وتفرح قلبنا
رمضان كريم مش بس عليكم
ده كريم علينا كلنا
