الاقتصاد

النبي صلى الله عليه وسلم ..وصي علي سابع جار

جنبي جارة في مُنتهى اللُطف ، كُل سُكان العمارة بيِشتكوا منها ! :))
سِت كبيرة ٧٠ سنة تقريباً ، بينادوها بـ ” الحاجّة ”
عايشة لوحدها ، بيتها دايماً هادي جداً ، مابسمعش عندها اصوات ناس خالص غير في الأعياد والأجازات لما أولادها وأحفادها بيزوروها ،
غير كده كل صُبح إذاعة القرآن الكريم ،
وبالليل عبد الوهاب واوقات السِت.
من يوم ما سكنت جنبها وانا متعودة تخبّط عليا مرتين أسبوعياً ، مرة تشتكي من إن غسيلنا مبهدل غسيلها في اليوم اللي ماعندناش فيه غسيل ، ومرة تطلُب مني أي حاجة بسيطة ، كبريت ، ملح ، أو حتى بصلة علشان البصل عندها خلِص !!
بس في كل مرة بتقف تتكلم في حاجات كتير مالهاش أي علاقة ببعضها !
دفعتي فاتورة الكهرباء ؟؟! هو الجورنال النهاردة بيقول إيه ؟؟ هي العُمرة بقِت بكام دلوقتي ؟!
وانا بجاوِبها وأفضل أحكي معاها مهما طوِّلت وعطّلتني علشان بتصعب عليا وِحدتها.

النهاردة رجعت من شُغلي لقيت حارِس العمارة بيقولي شوفتي يا استاذة اللي حصل عند ” الحاجّة ” ؟
قولتله خير ! قالي نسيِّت طبيخها على النار وكانت هتحرقلنا العمارة يسامحها ربنا !!
اتخضيت جداً وسألته طب هي كويسة ؟؟!
قالي اه ماصابهاش حاجة بس الدخان مالي العمارة اهو وهنتخنق كلنا استغفر الله يارب !!
طلعت بسرعة ، شوفت الدخان كان مالي الدُنيا ،
خبطت عليها ، فتحتلي وعلى وِشّها ابتسامة عريضة غير مُبرّرة إطلاقاً ! ?
يمنى !! اهلاً اهلاً ادخلي ! قولتلها حضرتك كويسة ؟!!
حصل ايه ؟!!
قالتلي وهي بتضحك !! ادخُلي ادخُلي بس علشان ماحدش يسمعنا !!!
دخلت ، لقيتها وقفت قدامي وحطت ايديها على خدودها وقالتلي ” النهاردة أسعد يوم في حياتي ” !!!
قولتلها أفندم ؟!! على ما سمعت إن العمارة كانت هتتحرق النهاردة !!
قالتلي اه اه ! اصلي نسيت الملوخية على النار وربنا ستّر ! بس مش ده المهم !!
قولتلها صحيح مش ده المهم ! ايه هو المُهم ؟!!
قالتلي وهي بتضحك جداً هل تتخيّلي يا يمنى إن سُكان العمارة كُلهم طلعولي يطّمنوا عليا !!! هل تتخيّلي ؟؟! :))
قولتلها بجد ؟! قالتلي ااااه والله بجد ! حتى مدام فَدوى اللي في السادس ! هل تتخيّلي ؟!!!
انا سعيدة اوي يا يمنى انا سعيدة !! الباب مابطلش يخبّط عليا من الصبح لحد المَغربية !!
قومت طبطبت عليها وبوستها وقولتلها الحمدلله على سلامتك يا حبيبتي ، وجيت امشي ندهَتلي وانا على الباب ميِّلت عليّا ووشوشتني :

” هِي تِبقى بايخة لو نسيت الأكل على النار تاني ” ؟!!

اسئلوا علي جرانكم الي لوحديهم

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى