الاقتصاد

إنا لله وإن إليه راجعون..مليون رحمه ونور عليك يا زينة الشباب قلبنا انكسر عليك

تجديد الخطاب الديني ..زينة شباب مصر بنفتقدهم كل يوم في حوادث يدمي لها القلب .

الشاب الذي القي بنفسه من برج القاهرة.. شاب جميل، شبهي وشبهك وشبه أي حد عايش في الدُنيا دي.

شوفته وفي بالي سؤال واحد بس: يا تري خبط علي كام باب قبل ما ياخد الخطوة دي بكل قوة..
وهو واقف سرحان وتايه قبل ما ياخد القرار مكنش فيه أي حاجة تخليه يتمسك بالحياه دي؟ نط في ثانية لكن كان في فرصة لما شبك التيشرت في السور لكن فكه برضو.. يعني رغبته في أنه ينهي حياته كانت في دماغه من غير نقطة تردد.

ياتري كام واحد حواليه خد كلمة “انا عايز انتحر” هزار؟ يا تري حس بـ إيه.. وحدة؟ مستقبل ملهوش ملامح؟ .. يا تري كام حد خذله؟ كام مرة كان بيمشي بين صحابه يقول ” انا تعبان” ومحدش سمعه ولا حس بيه.. ياتري سمع جملة “انت اتنشن هور وبتدلع” كام مرة؟

يُقال أنه كان بيصلي ومش بيسيب فرض، يعني شخص عارف ربنا.. المرض النفسي فعلاً أكبر من قدرة تحمل أي شخص، والوضع اللي إحنا وصلنا له يخلي نفسنا أحيانًا ضعيفة حتي لو عارف ربنا.. حتي لو بتصلي.. الاكتئاب وحش اللحظة اللي بيسيطر فيها عليك مبتقدرش تقاومه.. كأنك في نفق ضلمة ومفيهوش ولا نقطة نور واحدة.

حادثة نادر قلم ليا وليك ولأي حد، أنك تاخد بالك.. تاخد بالك من أن الحياة ضاغطة، وأن كلنا ماشين وعلي كتافنا حمل الدُنيا كله.. تاخد بالك من كلامك لأن كلمة واحدة ممكن تنهي حياة بني أدم أو ممكن تخليه يحاول يتمسك بالدُنيا أكتر.

بنضحك في الصور صح؟ الصور مش هي كل الحقيقة دي لحظة، في صورة تانية محدش يعرف عنها حاجة، كل يوم بترجع لوحدك علي سريرك وفي دماغك مليون فكرة واحساس.. بتعيش لوحدك صراعاتك النفسية ومشاكلك.. ومطلوب تصحي الصبح وأنت بتضحك ومبسوط علشان تكمل حياتك.

صدقوا أي حد يقولكم أنه تعبان ومتضايق،
خدوا بالكم من أي حد حواليكم لقيتوه مكتئب وحزين، أسألوا علي بعض.. اسألوا علي بعض، متصغروش من أسباب الزعل صدقوا وخليكم جمبهم حتي لو بكلمة.

مش معني إن ابنك بيقولك “انا تعبان” أنه بيتدلع، مش معني انه بياكل ويخرج ويلبس ويتعلم أنه كويس ومينفعش يتضايق ولا يتعب.. احنا عايشين في مجتمع ضاغط تصرف واحد بيحاول حياتنا جحيم! احضن ابنك او بنتك، اتكلموا معاهم، افهموا مشاعرهم، حسوا بيهم.

أنت لو بتقدر تعدي مشاكلك، أدعي لنفسك بالثبات.. غيرك ضعيف مش قادر.

ربنا يرحمه، ويهون علي كل اللي عايش. مليون رحمه ونور عليك ..ربنا وحده اعلم بيك وهو واحده قادر علي أن يغفر لك ويسامحك ..

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى