محمد صلاح يكتب
إيه اللي حصل في حادثة Admarine-12؟
(تحليل فني مبسط لأخطر لحظة في تشغيل أي بريمة بحرية)
أولاً: البريمة Jack-Up Rig
هي وحدة حفر بحرية بتتحرك باستخدام Jack-Up Barge، وبتعتمد على أرجل حديدية بتتنزل على قاع البحر لتثبيت الوحدة وقت التشغيل. أثناء التنقل، الأرجل بتترفع والبريمة بتكون محمولة بالكامل على سطح المركب، وده أخطر وضع ممكن.
يعني إيه موف؟
لما نقول البريمة في وضع Move، يبقى الأرجل مش ثابتة على الأرض، والمركب بيحاول ينقلها من موقع لموقع. في اللحظة دي، أي ميل بسيط أو خلل في الوزن أو خطأ في التقدير ممكن يؤدي لـ capsize (انقلاب) أو انهيار جزئي.
المراكب المصاحبة للحركة:
Cargo Barge: لنقل المعدات
Tug Boats: لتوجيه وسحب البريمة
Support Boats: للدعم والإخلاء في حالات الطوارئ
إيه اللي حصل في Admarine-12؟
من خلال التحليل الفني وتعليقات عدد من الخبراء:
البريمة كانت في وضع حركة Move فوق أرضية رخوة وبرجلين أو 3 فقط وده خطر جدًا.
حصل خلل واضح في stability بسبب توزيع غير دقيق للحمولات.
اتضح وجود قصور في دور فريق الـ Rig Mover اللي مسؤوليته الأساسية تقييم الموقع والتأكد من صلاحية الأرض للوقوف عليها.
كمان في خلل واضح في أداء القباطين والمشغلين أثناء التنقل والقرار كان متسرع أو غير محسوب كويس.
ماينفعش نغفل كمان إن البريمة نفسها حالتها الفنية كانت تستدعي مراجعة، لأن واضح إن في ضعف في قدرة الأرجل على التثبيت السريع في أي حالة طارئة.
النتيجة المركب فقد توازنه دخل في حالة ميل حاد، ووقع ضحايا بين وفيات ومصابين.
وُصف القرار بأنه تصرف غير مفهوم نهائيًا خصوصًا مع ضعف الحمولة (GRT) وعدم استقرار وضع الأرجل.
الخلاصة:
كان لازم يتعمل تقييم شامل قبل الحركة بمشاركة حقيقية من ال Rig Mover والقباطين والفنيين.
التأخير في اتخاذ قرار Abandon (الإخلاء) ساهم في تضاعف الخسائر.
الحادث مش نتاج خطأ واحد لكنه نتيجة سلسلة من القصور الفني والتنظيمي والتشغيلي.
رحم الله زملائنا ونتمنى الشفاء العاجل للمصابين والعثور السريع على المفقودين
الدروس المستفادة: أي تحرك في البحر لازم يبقى مبني على تقييم علمي دقيق لأن أخطاء البحر لا تعاد.
حفظ الله إخواتنا اللي في البحر وفي الصحراء وكل العاملين بقطاع البترول اللي بيشتغلوا في مجال البترول بكل صبر وشجاعة.
هم مش مجرد موظفين
دول جنود الدولة وسلاحها الحقيقي تحت في البحار والصحراء
شغالين في أصعب الظروف وتحت ضغوط عمل فوق العادة علشان مصر تفضل واقفة على رجليها وعلشان اللقمة الحلال فكل الدعم والمساندة للأبطال
رحم الله شهدائنا ، اللهم إلهم آهلهم وزويهم الصبر والسلوان وصبرنا على فراقهم
