كتب احمد عبد المنعم
وفي عشقه هي ماتتوصي
وف جرحها مبيتوصاش
عايشه بس ليه وعشانه
وهو ياعيني مدي طناش
بتحبه وبتموت قدامه
ولا بتحلم يوم غير بيه
وهي اصلا ولا ع باله
ولا عمره اتمني تكون ليه
فضلت كده ع الحال ده كتير
وهو ياعيني ولا بيبالي
احساس رخم ان انت تقيل
ع قلب بالنسبالك غالي
بكل هدوء قالت فوق
بص ياقلبي كفايه شوق
كنا ضيوف وتقال ع قلبه
يلا بينا بره حياته
وقراري المرادي محسوب
ولا عمري هرجع لعذابه
وتلف ايام وليالي
حس بغربه وشوق وحنين
ناقصه حاجه مش عارفها
وحشه حب من سنين
اصعب ندم انك تتندم
لما يضيع انسان بيحبك
كان في يوم بين أيدك
وياعالم اصبح مع مين
دور لف ف كل مكان
ولا لاقي يوم ليها بديل
اصل صعب ان انت تلاقي
حد يحبك قلبه اصيل
لف كتير
ملقاش بنت قادره تعوض
حتي نص حبها ليه
وخوفها عليه
قال لازم دلوقتي الاقيها
هرجع ليها
ولو زعلانه
هبوس ع راسها
حالا واراضيها
كلم اقرب ناس ليها
سأل عليها
بصوت مبحبوح
كله دموع
ردت بنت عليه وقالتله
فرح الحلوه كمان أسبوع
