بقلم الشاعر / اللواء محمد هيكل
عمر الحكايه ماتنتهي …. ولا الكلام له حصر
متحف وقلعه وهرم …. جامع كنيسه و قصر
نسمه وشمس وقمر …….. ونيل جميل الليل
تابلوه بديع و اترسم إسمه السياحه في مصر
يا أهرامات العجب ………. ياما بهرتوا ملوك
بسم الله ياابوالهول … من كل عين يشوفوك
زار التاريخ الاقصر ……… قال للزمان سجل
إن التاريخ من هنا ……… و اكتبها لو سألوك
ياللي انتو عاشقين الجمال روحوا إسألوا أسوان
بوسوا عيون مرسى علم ….. أم الشطوط ألوان
يا اسكندريه دا اللقا …….. والمشي فيكي كيف
ضحكت خدود الغردقه ….. قال الجمال غيران
السحر لما اتوهب … جريوا عليه الملايين
طابا نويبع دهب …. و متعة جبال كاترين
و تفضل مدينة السلام ضامه قلوب البشر
قلبي ياشرم الشيخ ….. دايب بنظرة عين
بلدي الجميله هنا …… و زي بلدي مفيش
قبل الزمان عاشت و رغم الجميع هتعيش
واخده الجمال احتكار والماركه مصراوي
لو عشت عمري اوصفك..الشعر مايكفيش
مفيش مكان يابلد ……. إلا وجماله جنان
ٱثار و بحر و بشر ……. مالي قلوبها حنان
يا كل أهل الأرض ……. قلوبنا شبه الورد
تعالوا ياللاه ادخلوا … مصر بسلام و أمان
